من حوالي خمس سنين توفي زوج أختي وأولادها الثلاثه في حادث سير علي إحدي الطرق السريعه
الخبر نزل علينا كلنا كالصاعقه وكانت صدمة كبيرة لينا كلنا وخاصة لأختي إن أولادها وزوجها يموتوا سوا ،
مستحملتش الخبر وإنهارت وحصلها تشنجات
وحالتها كانت صعبه فإضطرينا نوديها مصحه نفسيه
أختي فضلت تتعالج لمده سنتين
والحمدلله خفت وخرجت من المستشفي قررت تبيع بيتها القديم وبفلوسه تشتري شقه صغيره
تقعد فيها لوحدها
قلت لها وليه تبيعي شقتك طيب سيبي الشقة زي ماهي وتعالي عيشي معايا أنا ومراتي
قالت لي لا أنا عايزه أعيش لوحدي
قلت لها براحتك زي ماتحبي
تاني يوم كنت شوفت مُشتري للبيت وخلصت إجراءات بيع الشقه وإشتريت ليها شقه في منطقه في المدن الجديده
وبعد لما أختي إستقرت في شقتها الجديده
طلبت مني إنها عايزه واحده تخدمها في البيت وتهتم بيها .
قلت لها ماكنتي سمعتي كلامي وجيتي عيشتي معايا ..أنا ومراتي ليه الشحططه دي بس
قالت لي إسمعي كلامي أنا عايزه أعيش لوحدي
قلت لها طيب إللي تشوفيه
نزلت دورت بالعربيه بتاعتي وبالصدفه لقيت سيده بتشاورلي
وقفت ليها قلت لها تحت أمرك
قالتلي ممكن توصلني للموقف مش لاقيه عربيات خالص
قلت لها تمام إتفضلي إركبي
ركبت معايا ودار بينا حوار
قالتلي إنها أرمله عمرها أربعين سنه .عندها ولدين متجوزين وعايشين في الخارج
وهي عايشه لوحدها يعني يعتبر مقطوعه من شجرة زي ما بيقولوا لما فهمتها علي ظروف أختي وكده
قالت لي موافقه أخدمها بس هاخد 3000 في الشهر
قلت لها موافق بس بشرط تهتمي بأختي وتخلي بالك منها
خدتها وروحنا علي أختي في شقتها وعرفتها عليها ..قلت لأختي دي سمر إللي هتساعدك وتنفذلك طلباتك
أختي إرتاحت ليها وقالت لي طيب ماشي إتفضل أنت بقي علشان متتأخرش وكتر خيرك علي وقفتك جنبي دي
قلت لها لو مكنتش أقف جنبك في وقت زي ده هقف جنبك إمتي وأي حاجه تحتاجيها إتصلي بيا فوراً في أي وقت ..
سلمت علي أختي وقبل ماأمشي وصيت سمر عليها
ومشيت بعد أسبوع لقيت أختي بتتصل بيا
قالت لي تعالي عايزاك في موضوع مهم .
نزلت من البيت وركبت العربيه وروحت لأختي
وأنا داخل العمارة لقيت عم أحمد البواب سلم عليا وقالي يابيه الست إللي بتخدم أخت حضرتك
بقالها يومين بتنزل بلليل متأخر وأنا بشوفها من شباك أوضتي بيكون في شاب مستنيها وتمشي معاه
قلت له الساعه كام حصل الكلام ده ياعم أحمد
قالي مش فاكر بالظبط بس تقريباً كانت الساعه 2 بلليل
قلت له طيب ياعم أحمد هطلع لأختي
ولما أنزل لينا كلام سوا .. طلعت لأختي خبطت علي الباب فتحتلي سمر
قالت لي أمال هانم قاعده في البلكونه
قلت لها طيب دخلت البكونه لقيت أختي قاعده حزينه
قلت لها في إيه خير ؟
قالت لي سمر الخدامه أنا شاكه فيها وخايفه منها
قلت لها إزاي فهميني أكتر………ياتري ايه حكاية الخدامه!؟.. يتبع
لتكملة القصة اضغط على الرقم 2 في السطر التالي 👇
